Litlir kassar, tómir kassar eða eintómir pappakassar...

Ég hef að því að mér finnst haldið aftur af mínum skoðunum varðandi þjóðmálin á síðustu misserum.
Það ber að klappa mér á bakið fyrir það. Finnst mér...
Hins vegar er það þannig að ég er að verða svo þreyttur á þessu bulli.
Hvurs konar helvítis apasamfélag er þetta sem við búum í.
Mun ekkert breytast nokkurn tímann?

Þá spyr maður sig hvað þarf að breytast?
Lítið dæmi...
Ráðuneytisstjóri selur bréf sín í Landsbankanum eftir krísufund í UK en rétt áður en bankinn er þjóðnýttur!!!
Tilviljun? Nei í mínum huga sem flestra annars sem ég hef rætt við er hið minnsta um lélegt siðferði að ræða ef ekki innherjaviðskipti.
Á manninum að vera stætt á því að starfa áfram sem ráðuneytisstjóri? Nei.

Með fullri virðingu en við munum eftir því hvaða grín var gert að veikindum fyrrv forsætisráðherra hér um árið. Gæti verið að illt innræti sé farið að grassera í honum aftur? Vona ekki hans vegna sem og hans fjölskyldu. En er ekki tími fyrir hann að fara til Kanarí með Guðna bara eða jafnvel að komast í settlegt djobb út í heimi eins og Halldór vinur hans og hershöfðingi...

Hvers vegna í andskotanum ber enginn ábyrgð í þessu þjóðfélagi okkar?
Hvernig er hægt að ætlast til þess að við þegnar landsins treystum sömu mönnum til að reisa landið við og komu okkur í þessa stöðu?
Þar er enginn undanskilinn að mínu viti hvorki pólitíkusar, Seðlabankastjórnendur, Fjármálaeftirlitið og allra síst viðskiptamógúlarnir.

Hvers vegna í andskotanum komast pólitíkusar upp með það svara ekki fréttamönnum loksins þegar það koma ágengar spurningar?
Hvers vegna leyfa fjölmiðlamenn Geir að verða grömum, fúlum og pirruðum í viðtölum og komast undan því að svara?
Fjölmiðlar gangið á þessa menn!!!
Ekki láta þá komast upp með skæting í stað svara!!!
Það er ykkar vinna að ganga á eftir ókláruðum málum og krefjast svara.

Einu sinni var talað um að Rússar hefðu hug á því að gera Vestfirðina okkar að fanganýlendu.
Það var á tímum seinni heimstyrjaldarinnar ef ég man rétt.
Spurningin er hvert getum við sent ráðamenn þjóðarinnar í útlegð?
Við erum jú aumingjagóð og megum helst ekkert aumt sjá.
Er þá ekki best að taka á leigu eins og eina vél og senda liðið bara aðra leiðina til Kanarí?
Það þýðir kannski það að við þurfum að finna okkur nýjan samastað fyrir eldri borgara ferðirnar okkar. Það er tiltölulega lítill fórnarkostnaður ekki satt?

Ég held að ástandið sé þannig að það skapist ekki ró eða sátt fyrr en það er búið að gera almennilega hreingerningu svona rétt rúmlega jólahreingerningu...
Það væri óskandi að aumingjar þessa lands ég sem aðrir létum stjórnmálamenn þjóðarinnar finna fyrir því í næstu kosningum.
Strikum aumingjana út.
Skráum okkur í flokkana og látum rödd okkar heyrast í prófkjörum ef landsfeðurnir þora þá í prófkjör.
Vona svo sannarlega að það verði engar helvítis uppstillingar nefndir sem raða gæðingunum á þá staði þar sem "trygg" sæti á Alþingi okkar "eiga" að vera.
Dýralæknir landsins sagði "réttilega" að þjóðin felli dóm um störf þeirra í kosningum.
Þar af leiðandi finnst þeim kumpánum þeir ekki þurfa að segja af sér.
VIð skulum ekki gleyma þegar það kemur að kosningum hvað þessir menn hafa sagt, gert og komið okkur í.
Ég mun skrá mig í alla flokka til að geta látið mína skoðun koma í ljós í prófkjörum fílabeinsturnanna.
Ég skora á ykkur að gera það sama.

Íslendingar hættum að láta allt yfir okkur ganga.
Tökum höndum saman og hreinsum vitleysuna út næst þegar við fáum tækifæri til.

Bara verst að það þarf að finna eitthvað í staðinn fyrir það sem er.
Eitthvað trúverðugt.
Þar liggur hundurinn grafinn, eða hvað?